談愛情

以前o既我，總係久唔久就會講下自己o既愛情生活、對愛情o既睇法



人大左，可能加上宜家感情上好穩定，雖然好多時都係想寫低落黎，但有時又會覺得：生活上有d 野留白可能都好好，或者係覺得因為一切都平淡但美滿，所以冇咩好寫，又或者係宜家哩刻o既我，比較著重好好經營，因為宜家所追求o既，唔再係細路女時轟轟烈烈有笑有淚o既愛情，而係可相守到老o既關係



自問比常人諗多d 野 (或者係庸自人擾啦 ~) 久唔久我都會回首以往，因為我覺得，宜家自己所擁有o既經歷、諗法，好多時都取決於究竟自己以往所受o既教訓。前陣子同朋友講起以往o既感情事，問我：會唔會因為失去過某個人，或者錯過左某個人而所以好留戀佢? 我o既客案係：絕對唔會



我覺得，可以相戀，其實係好講天時地利人和。如果當初仲同某一個人一齊，但最後因為某一d 原因而分左手，可唔可以過多幾年復合呢，我覺得唔可能。因為當初大家一齊時，如果o個一下解決唔到當前o既問題，其實已經係表示大家冇能力再一齊走落去，或者分開左之後，有一方面係解決左個問題，但係唔可以一廂情願覺得："之前個問題，我已經解決左啦! " 更因為自己單方面思想而覺得可以再走返埋一齊，因為o係可以一齊work out 時，大家已經放棄左，人生冇point of return，唔係可以話從頭黎過就一切可以拉倒重來。當初有克服唔到o既困難，難保之後再一齊後，問題唔會再出現，更加重要係，之後會唔會有第二第三甚至第n 個解決唔到o既問題呢? 係咪又可以再輕言放棄呢? 我覺得咁樣好累人



其實早一排自己o既愛情生活都唔太如意，因為自己o既感情生活，畀一d 已經過去左o既人牽絆住，但我可以話無能為力去解決。先唔講自己對哩個人o既睇法或者觀感如何，我係覺得，當初放棄，或必須放棄一個人時，如果自己仲死死咁將自己縳o係一段已經過去左o既情感上，對自己，對對方，甚至係自己身邊同埋對方身邊o既人，都係一種沉重o既負擔。過去左o既野已經冇得抉留，既然哩一刻選擇左同另一個人一齊，我覺得先要忠於此人，因為冇野係比宜家哩一刻同哩一個人更重要，或者回憶係好美好，但畢竟人唔可以攬住回憶過世，如果唔愛宜家哩個人，又做乜要同佢一齊呢? 水泡麼?另一方面，如果硬bang bang 咁仲o係一d 公眾地方成日提住 "其實我仲好鍾意xxx"，我覺得對對方好慘。自問經歷左三年，三年以黎都有個人不停咁用一d 方法去提住："我仲好掛住你"，我係覺得好煩好煩，感覺係哩個人既唔肯放開自己，亦到要夾硬摶埋我沉淪埋一份，o個一種 "我得唔到你所以都唔要你 (同你身邊o既人)好過" o既感覺好沉重。我唔介意之前愛我o既人會將我默默地放o係心上，但我好介意自己過去o既人或者宜家我愛o既人佢身邊已經過去左o既人，仲o係度日日提住哩一刻我仲係點愛以前o既我/佢。宜家示威麼? 哩種痴心，換黎o既只係打擾對方生活。雖然此刻唔再相愛，但我都想見到過去左o既人能夠努力向前，去找尋屬於佢地o既幸福，rather than去破壞宜家一d 已經唔再屬於佢地o既野。



近期都有件事值得開心，因為我睇到身邊o個個人佢有左進步。或者係相處兩年幾，佢個思想模式都係比較簡單同單一，所以我好多時都會expect 左佢某d 野點做。記得o個個星期五晚我聽佢無啦啦提起想轉換工作，我係暴跳如雷，因為我心知佢想轉換去邊一種工作 (不過我更清楚佢o個一下係唔會認)，而我自己都認定係唔好。哩排同佢平心靜氣閒談多幾次，聽左佢一d 諗法，先發覺佢已經同以前有少少改變。以前我覺得佢淨係會諗住去玩同埋點玩，今朝有酒今朝醉個感覺好重，但原來佢宜家已經會諗到究竟將來會點，同埋佢期望自己想做d 咩同埋做到咩地步，更加會set 一個point 去畀自己究竟做到哩位需要stop，亦都學識等待，哩d 都係佢超出我expect o既事。如果哩刻再問我贊唔贊成呢? 我諗已經唔再係和而不同o個隻 : "我唔贊成，但我尊重" ，而係我都會選擇去支持佢，因為我見到佢o既改變，佢比以前成熟左，同埋趁佢有能力去試時，不如畀佢放手一試，或者我地o既將來更好呢。



見到佢o既改變，我覺得我都唔應該再自怨自艾生活o既苦事。生活本應充滿辛酸甜辣，有一個人會同自己一齊品嘗哩d 味道，應該感恩