2010 大事回顧

2010, 對我黎講真係發生左好多大事

工作上:

終於變成一間MNC o既永久僱員, 點講呢, 從前O既我, 覺得做大公司同細公司, 其實都係冇咩分別, 如果係叻的話都係搵到錢, 但自入左黎之後, 我哩個諗法改變左, 都明白點解D人要死命碌去大公司。

大公司, 我唔知人工係咪真係好D, 但福利來說, 真係好D, 保障多D, PACKAGE 好D, CAREER PATH 清楚D, 機會多D。 入左黎之後, 我終於攞到一個我以為仲要等多一兩年O既人工 (雖則對比我其他同事, 我個價依然係賤價), 同同我同年o既朋友比較, 我份工算得上比較託賴, 畢竟好似所有野比人都好少少。 其實, 我都心安了, 只係, 工作時間唔穩定得黎可以好長, 哩D就係所謂TRADE OFF

出左人生第一個需要搭飛機o既business trip, 一去就去到好x 遠o既美國, 仲要一去成大半個月, 有好多工作上, 文化上, 生活上o既體驗。 仲記得搭飛機離開香港o個下, o係架機度真係好想喊, 萬里遙遙去到華盛頓玩, 我都只想返屋企; 到north carolina 後就每日不段工作+ 工作+工作，一日真係可以做18小時, o個段日子, 真係好瘋狂, 但我好記得當時o既諗法係 -- 人在異鄉, 既然又掛住身邊o既人, 又訓唔到覺, 倒不如將時間心機花o係有意義o既事上, 眼前最有意義o既事係---> 清晒手上一堆o既工作

咁勤力工作當然有後果, 就係個胃又壞左, 一醫就醫左個幾兩個月

年終最震憾係我個hea 爆老細居然升左職, 更加了解: 職場上升職, 只要試令老細覺得你有作為就得, 究竟你交咩功課, 同埋周遭o既人點睇你, no big deal, 只要你老細睇你台戲就得

唉, 哩d道理，真係知易行難, 雖然我唔奢望d 咩, 但畢竟要更上一層樓時, 我仲爭緊一d 成熟處事o既經驗。

感情上:
終於開始plan結婚，過程中當然有好多好多野煩, 更煩係當中有好多好多野要駛錢, 更加要諗下兩個家庭o既融合, 同埋, 真係要認真咁諗下, 究竟要完全嫁出去, 究竟會有咩改變。

結婚基本上好多硬件已經搞掂, 但軟件o既野, 真係都唔知由邊度諗起好。

年中時男友開始全力搞酒吧, 令兩人都受到唔同考驗, 生活上, 習慣上, 都有好多大大小小o既改變, 更加明白愛是恆久的忍耐+堅持+包容。當然, 衝突唔會一下子消失, 我希望明年一切上軌道後會順順利利。

生活上:
今年o係生活上冇咩大轉變, 但感覺係健康左, 更加認清左某d 目標, 我成日同朋友們強調一樣野-- 我地要面對現實o既問題。今年對我黎講, 可能真係發生o既事比較多, 人要向實際方向去做好多planning, 亦需要更明白究竟現實上有d 咩係局限左, 要實際上去為某d事作出改變。可以話無可奈何, 都可以話咁係勢利, 但更重要係, 真係成長左。

總括而言, 2010 係工作年, 希望今年所學到o既野, 會為我將來帶黎更大得著!